3. ผลทายกวิมานวตฺถุ
[1060]
‘‘อุจฺจมิทํ มณิถูณํ วิมานํ, สมนฺตโต โสฬส โยชนานิ;
กูฏาคารา สตฺตสตา อุฬารา, เวฬุริยถมฺภา รุจกตฺถตา สุภาฯ
[1061]
‘‘ตตฺถจฺฉสิ ปิวสิ ขาทสิ จ, ทิพฺพา จ วีณา ปวทนฺติ วคฺคุํ;
อฏฺฐฏฺฐกา สิกฺขิตา สาธุรูปา, ทิพฺพา จ กญฺญา ติทสจรา อุฬารา;
นจฺจนฺติ คายนฺติ ปโมทยนฺติฯ
[1062]
‘‘เทวิทฺธิปตฺโตสิ มหานุภาโว, มนุสฺสภูโต กิมกาสิ ปุญฺญํ;
เกนาสิ เอวํ ชลิตานุภาโว, วณฺโณ จ เต สพฺพทิสา ปภาสตี’’ติฯ
[1063]
โส เทวปุตฺโต อตฺตมโน…เป.… ยสฺส กมฺมสฺสิทํ ผลํฯ
[1064]
‘‘ผลทายี ผลํ วิปุลํ ลภติ, ททมุชุคเตสุ ปสนฺนมานโส;
โส หิ ปโมทติ [โมทติ (สี. สฺยา. ปี.)] สคฺคคโต ติทิเว [ตตฺถ (ก.)], อนุโภติ จ ปุญฺญผลํ วิปุลํฯ
[1065]
‘‘ตเววาหํ [ตเถวาหํ (สี. สฺยา. ปี.)] มหามุนิ, อทาสิํ จตุโร ผเลฯ
[1066]
‘‘ตสฺมา หิ ผลํ อลเมว ทาตุํ, นิจฺจํ มนุสฺเสน สุขตฺถิเกน;
ทิพฺพานิ วา ปตฺถยตา สุขานิ, มนุสฺสโสภคฺคตมิจฺฉตา วาฯ
[1067]
‘‘เตน เมตาทิโส วณฺโณ…เป.…
วณฺโณ จ เม สพฺพทิสา ปภาสตี’’ติฯ
ผลทายกวิมานํ ตติยํฯ
4. ปฐมอุปสฺสยทายกวิมานวตฺถุ
[1069]
‘‘จนฺโท ยถา วิคตวลาหเก นเภ, โอภาสยํ คจฺฉติ อนฺตลิกฺเข;
ตถูปมํ ตุยฺหมิทํ วิมานํ, โอภาสยํ ติฏฺฐติ อนฺตลิกฺเขฯ
[1070]
‘‘เทวิทฺธิปตฺโตสิ มหานุภาวา, มนุสฺสภูโต กิมกาสิ ปุญฺญํ;
เกนาสิ เอวํ ชลิตานุภาโว, วณฺโณ จ เต สพฺพทิสา ปภาสตี’’ติฯ
[1071]
โส เทวปุตฺโต อตฺตมโน…เป.… ยสฺส กมฺมสฺสิทํ ผลํฯ
[1072]
‘‘อหญฺจ ภริยา จ มนุสฺสโลเก, อุปสฺสยํ อรหโต อทมฺห;
อนฺนญฺจ ปานญฺจ ปสนฺนจิตฺตา, สกฺกจฺจ ทานํ วิปุลํ อทมฺหฯ
[1073]
‘‘เตน เมตาทิโส วณฺโณ…เป.… วณฺโณ จ เม สพฺพทิสา ปภาสตี’’ติฯ
ปฐมอุปสฺสยทายกวิมานํ จตุตฺถํฯ
5. ทุติยอุปสฺสยทายกวิมานวตฺถุ
[1075]
สูริโย ยถา วิคตวลาหเก นเภ…เป.…ฯ
(ยถา ปุริมวิมานํ ตถา วิตฺถาเรตพฺพํ)ฯ
[1079]
‘‘เตน เมตาทิโส วณฺโณ…เป.…วณฺโณ จ เม สพฺพทิสา ปภาสตี’’ติฯ
ทุติยอุปสฺสยทายกวิมานํ ปญฺจมํฯ